De 1 ao 25 de marzo estase desenvolvendo no Centro de formación e Recursos de A Coruña o curso “Inclusión, diversidade e mellora das competencias básicas”. Dentro deste curso, un relatorio relaciona a programación por competencias e educación inclusiva; concretamente refírese ao caso dos alumnos con parálise cerebral escolarizados nos centros ordinarios. Este relatorio titúlase “O desenvolvemento das competencias nunha escola inclusiva. O caso dos alumnos con parálise cerebral”. Nel faise un percorrido desde a aparición e a orixe desta nova “moda” da programación por competencias, cunha postura crítica, ata as dificultades e obstáculos con que se atopa a educación inclusiva e as posibles solucións para acadar non unha mera inclusión destes alumnos no sistema educativo ordinario, senon practicar unha verdadeira educación inclusiva poñendo tódolos medios para vencer resistencias e atrancos.
Os obxectivos deste relatorio son:
- Determinar unha serie de conceptos previos.
- Reflexionar sobre se é posible o desenvolvemento de competencias e unha escola verdadeiramente inclusiva.
- Reflexionar se é posible “ser quen”, na medida das posibilidades de cada un, e conxugar intereses económicos, mercantilismo e atención á diversidade.
- Constatar se un modelo baseado en competencias dificulta a atención á diversidade.
- Sacar consecuencias sobre as dificultades que, na práctica, existen na escola inclusiva con casos reais.
- Expoñer un caso práctico (parálise cerebral) e as decisións levadas a cabo.
- Profundizar nos puntos fortes e débiles que se poidan achar.
- Facer propostas de mellora e sacar conclusións para conseguir unha escola inclusiva de calidade.
Nesta época de crise con licenza, en ocasións, para recortar recursos á educación é unha boa ocasión para reflexionar e alegrarse polo conseguido na inclusión dos alumnos con necesidades educativas e perseverar no obxectivo de conseguir maiores cotas de inclusión e de máis calidade.
No hay comentarios:
Publicar un comentario